عشان اكتشفت ان فى ناس بتلخبط بينهم 1 - النقط اللى فى وسط الحراشيف فى اليونانى 2 - مهماز الورك فى اليونانى علامات البطن غير منتظمة و كثيفة فى اليونانى ، اما فى المصرى فتكون مثل خطوط فوق بعضها تشكل علامة مثل المثلث المهم بقى ان الصور دى فيها الاساسيات بس لكن لازم نعرف ان كل نوع منهم فيه درجات كتير من لون حراشيف الصدفة وكمان كثافة الخطوط اللى بين الحراشيف فى الصدفة كمان المصرية أصغر بكتييير فى الحجم من اليونانية
1 - السلحفة تكون نشطة و متنبهة
2 - العين صافية و رائقة و سوداء لامعة و ليس بها افرازات او عماص او منتفخة او مغلقة .
3 - المنقار أو الفم يكون الفكين فوق بعض مفيش واحد فيهم خارج عن التانى ، مفيهوش تكسير او اعوجاج او افرازات مثل القئ مثلا .
4 - الأيدى سليمة و بتقدر تمشى عليها و الأظافر كلها موجودة .
5 - الارجل سليمة و بتقدر تمشى عليها و الأظافر كلها موجودة .
6 - الذيل يكون نظيف و فتحة الاخراج نظيفة و غير متورمة او مجروحة
7 - الصدفة تكون لامعة و ليس بها كسور او تشققات او تعفنات من اعلى او من
اسفل ( الصديرى) و غير ملونة صناعيا بالالوان و البويات ، و ايضا لا يكون
عندها تهرم
العملية دى بتتعمل فى غرفة مظلمة جداً و باستخدام كشاف يدوى صغير
و يجب ملاحظة ان عدد الايام اللى فى الصورة بيختلف + أو - 10 ايام بأختلاف
نوع السلاحف ( المصرى غير اليونانى غير السولكاتا و و و و ........)
ولازم نتأكد ان الكشاف مش سخن من الناحية اللى بيلمس فيها البيضة
و منحطهاش كتير قدام الكشاف
و لما ترجع البيضة ترجعها على وضعها الأول زى ما كانت
...
شرح للصورة عشان لو فى حد الصورة مش باينة عندة
- البيضة حتى 14 يوم لا يكون ظاهرا فيها الا الصفار و البياض فقط و هذا فى اى بيضة سواء كانت مخصبة او غير مخصبة
- البيضة فى 20 يوم ستبدأ الشعيرات الدموية فى الظهور
- البيضة فى اليوم 31 يبدأ الجنين فى الظهور كبقعة سوداء
-البيضة فى اليوم 47 أصبح الجنين يملأ جميع فراغ البيضة و لا يظهر غير الكيس الهوائى
التزاوج و وضع البيض و طرق تحضينة فى السلاحف البرية
************************************
طبعاَ بيجيلنا أسئلة كتير عن تزاوج و بيض السلاحف البرية
هنحاول فى الموضوع دة نغطى معظم الأسئلة اللى بتيجى عن الموضوع دة
و اهم حاجة انك تفتح الروابط اللى فى وسط الموضوع و تتفرج عليها لانها بتفهمك كل حاجة عن طريق الفيديو
_____________________________
1 - خطوات التزاوج
_____________________________
دائماً ما يكون موعد التزاوج فى فصل الربيع بعد الخروج من البيات الشتوى و يستمر حتى منتصف الصيف
اول حاجة بتحصل هى التحرش بالانثى ، هتلاقى الذكر بيجرى ورا الانثى فى كل حتة فى الصندوق و لما بيوصل لها بيقعد يخبط الصدفة بتاعتة فى صدفتها بصوت مسموع ممكن تسمعة من بعيد و كمان ممكن يعضها من رجلها و من ايديها ، لو الانثى جاهزة للتزاوج هتسكت و تقف ، لو مش جاهزة هتمشى و تسيبة وممكن تعضة و تضربة و ممكن توقعه على ظهرة ، طيب لو الانثى وافقت ؟ هتلاقى الذكر اعتلى الانثى من الخلف و وقف على قدمية الخلفيتين و يضع الصديرى المقعر الخاص به فوق الصدفة المحدبة الخاصة بها و بدأ فى عمل أصوات الجماع (مميزة جداً فى السلاحف المصرى ) و يبدأ فى أدخال العضو الذكرى داخل الانثى و تستمر هذة العملية 20 دقيقة و احياناً اكثر ، اذا اكتملت العملية فان السلحفاة تستطيع الاحتفاظ بالحيوانات المنوية بداخلها لمدة قد تصل الى 4 سنوات جاهزة لتخصيب بيض خلال هذة المدة ، يعنى انت ممكن تشترى انثى و تبيض بيض مخصب من غير ذكر .
_____________________________
2 - ازاى نعرف ان الانثى حامل ؟
_____________________________
المفترض ان الانثى بتبيض بعد التزاوج بفترة من شهر و نصف الى شهرين (45 :60يوم ) و هتظهر على الانثى علامات انها حامل فاغلب الاناث هتلاقيهم بيتصرفوا بغرابة شوية فى الفترة اللى قبل وضع البيض ، هتلاقيهم بيتعاركوا مع الاناث التانيين لو موجود اناث تانيين و عندهم زيادة فى النشاط و بيتسلقوا كل حاجة و حتى بيحاولوا يتزاوجوا مع السلاحف اللى حواليهم سواء كانوا ذكور او اناث حتى ممكن يعملوا اصوات الجماع اللى بيعملها الذكور ، المهم بقى ان قبل وضع البيض مباشرة بيحصل حالة من قلة الحركة و تشمم الارض و قلة تناول الطعام و حتى الامتناع عن تناول الطعام نهائياً ، و فى الدول الاخرى مش عندنا طبعاً تقدر تروح للبيطرى يعملك اشعة اكس x-ray و تعرف السلحفة حامل و لا لأ
____________________
3- هى السلحفاة ممكن تبيض بدون تلقيح ؟ و تقدر السلحفة تبيض لغاية عمرها ما يبقى كلم ؟
______________________
أيوة ممكن لكن دة بيحصل قليل ومش لازم تبيض زى الفراخ ، اما بالنسبة للعمر فيفضل دائما تعريض الاناث الصغيرة (البالغة طبعاً) للتزاوج لانها بتكون اقل عرضة للاصابة بمشاكل وضع البيض ، و الكبيرة فى السن عادى تبيض بس على شرط انها تكون باضت كذا مرة قبل كدة ، لكن متجيبش سلحفة كبيرة فى السن و مباضتش قبل كدة و تخليها تتزاوج و تبيض احتمالات ربط البيض بتكون اعلى بكتير
https://www.youtube.com/watch?v=hQKWiBXD7rw
https://www.youtube.com/watch?v=qmSMcvZpgxY
https://www.youtube.com/watch?v=Bxhqd7IwQiU
_____________________________
4 - نعمل اية لو السلحفة باضت ؟
_____________________________
- اول حاجة عشان البيض يفقس بنجاح لازم يتوفرله 3 حاجات مهمة :
1 - تربة متوسطة لا هى ثقيلة و لا هى خفيفة ( خليط من البيتموس و الرمل بنسبة متساوية ) ، و السلاحف دايما بتختار ان الارض اللى هتحط فيها البيض تكون مائلة ميل بسيط عشان متحتفظش بالميه ، و يكون المكان بتوصله الشمس ، و الارض لازم تكون صالحة للحفر وبتعمل الحفرة بتاعتها شبه الجرس المقلوب يعنى واسعة من فوق و ضيقة من تحت و عشان التربة كويسة فالحفرة مش هتنهار قبل ما تحط بيضتها فيها ، و عادة وقت وضع البيض بيكون من الظهر حتى قبل المغرب بقليل ، و مهم جدا توفير المكان اللى السلحفة هتحط بيضها فية عشان ميحصلش ربط بيض للسلحفة ، و السلحفة المصرى بتحفر حفرة عمقها حوالى 5 سم فقط و تضع فيها بيضة طولها 3.2 سم و عرضها 2.3 سم فى المتوسط و وزنها يتراوح بين 7-9 جرام ، و غالبا بتحط بيضة واحدة كل مرة و لغاية ما تحط من 4 : 5 بيضات على مدار اسبوع او 10 ايام و ممكن تتبعهم بدفعة تانية بعد حوالى 3 شهور . و مدة تحضين البيض بتكون من 85 الى 110 يوم
اما السلحفاة اليونانية فهى بتحفر حفرة اعمق من 10 الى 15 سم و بتبيض من 1 : 12 بيضة كحد أٌقصى فى الموسم و البيض بيفقس بعد فترة من 65 الى 85 يوم و البيضة حجمها اكبر من حجم البيضة الخاصة بالسلحفاة المصرية
2 - درجة حرارة من 30 درجة الى 31.5 درجة و لازم نعرف حاجة مهمة ان بيض السلاحف بيخضع لقاعدة مهمة جداَ ESD و هى Environmental Sex Determination
يعنى تحديد الجنس بيئياً .يعنى اية ؟ يعنى نوع الجنين بيتم تحديدة طبقاَ لدرجة الحرارة المحيطة بالبيضة فدرجات الحرارة المنخفضة (أقل من 30 ) أثناء التحضين تنتج ذكور ودرجات الحرارة المرتفعة(أكثر من 31.5 ) اثناء التحضين تنتج إناثاً ، و عشان كدة ابقاء درجة الحرارة بين 30 : 31.5 دة بينتج انواع مختلفة من الذكور و الاناث ، عشان كدة لازم يكون عندك ترمومتر و سخان لتعلية درجات الحرارة اذا كان التحضين فى الشتاء و هذا يحدث نادراً لأن غالبا التحضين بيبقى فى الصيف . بس فى بلاد تانية حتى فى الصيف درجة الحرارة بتكون اقل من 25 درجة مئوية .
و كمان لازم نعرف حاجة مهمة جداً ، كل ما كانت درجة الحرارة منخفضة فتطور البيضة بيكون بطئ جداً و تاخد وقت اطول عشان تفقس و ممكن تفشل فى الفقس اساسا و الجنين يموت ، و لو درجة الحرارة عالية ممكن تحصل تشوهات فى الجنين .
3 - درجة الرطوبة : و الرطوبة مهمة لبيض السلاحف لكن درجة الاهمية بتختلف حسب نوع السلحفة ، السلحفة اليونانى و المصرى اللى يهمونا لانهم هما اللى موجودين عندنا فدرجة الرطوبة المناسبة لهم هى من 70% الى 80 % و عشان كدة لازم يكون عندك مقياس للرطوبة ، و دلوقتى موجود مقياس للحرارة و الرطوبة الاتنين مع بعض
______________________
التعامل مع البيض
______________________
لو هتسيب البيض يفقس طبيعى يبقى ملكش دعوة بالبيض خالص لا تحركة و لا تقلبه ، سيبة مطرح ما هى دفنته و حافظ على درجة حرارة و رطوبة المكان
اما لو عايز تعمل تحضين صناعى ، فإما انك تشترى حضانة بيض و لازم تكون مخصصة للزواحف و دى بتظبط كل حاجة للبيض كل اللى عليك انك تنقل البيض بالراحة و تحطة فى نفس الوضع اللى كان علية فى الحفرة و بتحافظ على الوضع دة بانك بتعمل علامة بالقلم الرصاص على البيضة من فوق عشان لما تنقل البيضة تفضل العلامة دى فوق برضة .
و لو سمحت ألبس جوانتى لو اتعاملت مع البيض
أو لو مفيش حضانة جاهزة ممكن انت تعمل حضانة بانك تجيب بوكس بلاستيك بغطاء و تحط فية الرمل بالبيتموس و ترش فيه مية بالبخاخة كل يومين مرة و مش كتير ، و ترص فية البيض و تغطية بطبقة رقيقة من خليط التربة و مش لازم تدفنة تحت خالص و برضة مش لازم نص البيضة يبقى فوق (هو ممكن ) و تحط الصندوق فى مكان بتوصلة الشمس و تروح منه يعنى مش شمس ثابتة طول النهار ، و تعمل خروم صغيرة فى البوكس عشان الهوا ، و حط الترمومتر و مقياس الرطوبة ، و لو محتاج رطوبة اعلى ممكن تحط طبق بلاستيك فية سفنجة مبلولة جوة صندوق التحضين
https://www.youtube.com/watch?v=uDIBeLe2HeQ
______________________
ازاى السلاحف بتخرج من البيضة ؟
______________________
عملية الخروج من البيضة بتاخد وقت حوالى 8 ساعات الى 24 ساعة ، اول حاجة بتكسر جزء صغير من البيضة و تعمل يها فتحة صغيرة عشان تسمح بدخول الهواء للتنفس ، و قبل كدة الجنين كان بيتنفس عن طريق الهواء اللى بيدخل من مسام قشرة البيضة (عشان كدة بنقول الالتربة متكونش مكتومةو نرش مية بالبخاخة مرة كل يومين عشان الجنين ميتخنقش او يغرق ) ، بعد كدة الفتحة الصغيرة دى بتوسع شوية شوية على مدار الساعات التالية ، و بعد كدة بيقعد السلحوف الصغير فى البيضة شوية لأمور متعلقة بكيس البيض اللى بيكون فى بطنة و حتى يمتص اى بواقى من صفار البيضة ، و مهم جدا محدش يساعدة يخرج من البيضة و لا يشيلة من القشرة لو لقاة كسر القشرة و لسة قاعد فيها .و بعض انواع السلاحف بتاكل قشرة البيضة اللى خرجت منها ، بعدين يبدأ يتحرك و بتكون حركتة بطيئة و حساس جدا لاى مؤثر خارجى ، و كمان الصدفة بتاعتة بتكون لينة ، اهم حاجة انه يلاقى مكان يشرب منه مية بعد ما يخرج من البيضة لانه بيحتاج ميه كتير و يكون طبق مسطح لان السلحوف صغير جدا و ممكن يغرق ، و بعد حوالى 12 ساعة بيبدأ ياكل الاوراق الخضراء .
و نخلى بالنا ان البيض مش كله بيفقس مع بعضة كل بيضة بتطلع فى وقت مختلف عن التانية .
https://www.youtube.com/watch?v=vJvce2FiXZs
