تغذية السلاحف البرية

تغذية السلاحف البرية 
===================
غذاء السلاحف يتكون من غذاء عالى الألياف عالى الكالسيوم قليل الكربوهيدرات قليل الدهون بدون بروتين ، دة موجود فين ؟ طب ربنا خلقها بتعيش فين ؟ طب المكان اللى ربنا خلقها بتعيش فية دة ايه الأغذية المتوفرة فيه ؟ لما نجاوب هنعرف لية غذاء السلاحف مينفعش يعتمد على الخس و الخيار لان البيئة الاصلية للسلحفاة مفيهاش الاصناف دى اساسا ، و لأن الاصناف دى متنطبقش عليها المواصفات المطلوبة لأنها مش عالية فى الكالسيوم و الالياف بالقدر الكافى اللى محتاجاة السلحفة ، فى حاجة اسمها جداول تحليل الأطعمة دى هتلاقى فيها ان كل الأطعمة اللى خلقها ربنا فيها ألياف و كالسيوم لكن الكميات بتفرق مش معنى انى الاقى 0.01 ملجم كالسيوم/ 100 جم فى حاجة أقول دى فيها كالسيوم ، لأ طبعا ، لأن فية انواع تانية فيها 0.2 ملجم / 100 جرام . هى دى الفكرة ، ييجى واحد يقولك السلحفة بتاعتى بقالها 5 سنين عايشة ع الخس و زى الفل ، طيب قارنتها بطول و وزن بسلحفة تانية بتاكل أكل مختلف ؟ لأ . طيب سلحفتك باضت و جابت من 5- 8 بيضات فى الموسم ؟ لأ برضة . طيب سلحفتك شكل الصدفة بتاعها اية .. ورينى كدة ؟ الاقيها فيها تهرم ومقشرة و حالة السلحفة العامة مش حلوة ، عينيها مش بتلمع اظافرها مش قوية
المسموح تناولة :
=============
 الخس و الخيار لا يجب ان يمثلوا اكثر من 15 % من غذاء السلاحف ، و ال85 % الأخرى هى البرسيم المصرى (clover )  و سريس و جعديد و خرشوف  و ورق عنب و ورق توت و جرجير و ورد و ورق الذرة الاخضر و ورق القمح الأخضر  و انواع من الصبارات و اوراق التين الشوكى، مع مصدر إضافى للكالسيوم ، لأن البيئة اللى بتعيش فيها السلحفاة ارضها غنية جداً بالكالسيوم و دة حال أغلب الصحارى ، فبالتالى الأكل اللى بتاكلة هناك فية كالسيوم أكتر من اللى بتاكله عندك ، و دى حقيقة تغذوية معروفة ان نوع الغذاء بيتأثر بنوع و كمية  العناصر اللى موجودة فى الأرض و بالتالى العناصر دى بتزيد او بتنقص فى الأكل حسب تواجدها فى التربة . طب نجيب كالسيوم منين ؟ من عند اى محل بيبيع طيور زينة هتقوله عايز عظام الحبار (السيبيا) و تحط قدامهم قطعة يقرقشوا فيها .
كل اللى فات دة من غير حمام شمس يومى و ميه نظيفة للشرب مالهوش لازمة

=============
الممنوع تناولة :
=============
الباذنجان - القرع - الكوسه - الفول - الفاصوليا - البسله - الكرنب - القنبيط - البصل - الثوم - الثوم المعمر - البرتقال - اليوسفى - الليمون - المانجو - الجريب فروت - الفراولة - الرمان - البطاطس - السبانخ - البطاطا - الطماطم - الفلفل الحامى ( و يفضل منع الرومى أيضاً ) - الكرفس - السلق - البقدونس - الكزبرة - البروكلى - الجزر  - و غيره كتير ، لذا نرجو السؤال أولا قبل تقديم اى طعام جديد
==========================
 طيب لو فرضنا انك عجبك الكلام و حبيت تنفذ ، و السلحفة راسها ناشفة و غضبانة ع الأكل الجديد ... تعمل اية ؟؟
__________________________________

اول حاجة لازم تبقى قوي و مترجعش فى كلامك ، لو السلحفة مرضيتش برضة و قعدت يومين متاكلش فى اليوم التالت حط الأكل القديم بتاعها و معاه الأكل الجديد بس كمية صغيرة و قطعه بالسكينة كله قطع صفيرة و بله بشوية ميه و قلبة كويس فى بعضة ، و كل يوم تزود الاكل الجديد عن القديم ، و لو هى من اللى بيحبوا الخيار ممكن تعصر الخيار و تحط عصيرة على الأكل لان هى بتعتمد على حاسة الشم فهتشم الخيار هتطمئن و تاكل ، و يوم ورا يوم هتتعود على النظام الجديد